الحلقه التاسعه خليكى اجمل

الحلقه التاسعه
بعنوان
التبرج
الجزء الاول

_السلام عليكم ورحمه الله وبركاته
_وعليكم السلام ورحمه الله وبركاته

_إيه أخبارنا النهارده ؟!!
_تمام ... الحمد لله ...

_ماشاء الله علينا بقينا قمرات ...
شوفتى بقى بقيتى زىالقمر ازاى ...!!!
_آه ... أنا دلوقتى ببص لنفسى فى المرايا بحس إنى شكلى بقى أحسن بكتير ...
وطلع فعلا زى ماقولتى إن إللى يبقى مع ربنا
عمره مايكون وحش ابدا بس .... ؟!!!

_بس إيه بقى بعد الكلام الجميل إللى قولتيه ده؟!!
_ أصل أنا لما بدأت أخرج بالحجاب والناس بدأت تشوفنى بيه وكده ... و ....!!!

_ أظن هتقوليلى رأى الناس وكده ...؟!!!
_ آه ... أصل كتير منهم قالى كلام
خلانى أفكر فيه وبقيت مذبذبه شويه ...!!!

_ لا حول ولا قوه إلا بالله ....

أوعى تكونى من اللى ربناقال عليهم ( يستخفون من الناس ولا يستخفون من الله ) ....
بس على العموم قوليلى على كل إللى إتقال ليكى ...
وأنا معاكى هنفهم سوا معنى كلامهم ونشوف ياترى صح ولا ...
وهخليكى تكونى مطمنه بإذنالرحمن وتثبتى على اللى احنا وصلنا ليه ..
. اتفضلى ...
_ ماشى ... فى إللى قالى ...
خنقتى نفسك بدرى ماكنتى استنيتى
لما تتجوزى مثلا وابقى اللبسيه ...!!!

_ ياسلام ... ده على أساس إن الحجاب
هيمنع الجواز ولا إيه النظرية يعنى ؟؟!!
_ .......؟!!!

_ طيب نفهمها كده ببساطة ...
دلوقتى لما أنت تبيحى لنفسك أنك تتزينى وتظهرى مفاتنك عشان تجذب شخص ما ...
فى الحالة ديه مالكيش إنك تعترضى على إن أى واحده تعمل نفس اللى أنتى عملتيه
عشان تجذب زوجك مثلا أو ابنك أو غيرهم ليها ...
ونفرض إن ده حصل النتيجة هتكون إيه ...؟!!!
_ أكيد هتكون ....؟!!!!!

_ ببساطة كل شئ هينتهى ويضيع ...
ربنا سبحانه وتعالى لما فرض الحجاب علينا
كان الهدف منه صيانة المجتمع كله من الفتنة ...
وحصول الاستقرار ولأمن بالنسبة للمرأة ...
عشان مايكونش عندها أى شكوك تجاه زوجها مثلا ...
ياترى إذا خرج من البيت هيفتتن بواحده تانيه ويتزوجها ...
ولا هيرجع تانى البيت ؟!!!
_....... !!!!!!

_ طيب بلاش ده كله ...
نفرض إن ربنا ماكنش فرض علينا الحجاب ....
أنت عارفه المفروض احنا كنا نعمل إيه ؟!!
_ إيه؟!!!

_ كنا المفروض نطالب بيه وبشدة كمان ....
_ ليه ؟!!!

_ لانه ببساطة أكبر حماية وتأمين لينا ...
هتقولى ليه وازى ...
أقولك ليه وازى ....
لان نضارة المرأة موقوتة وفترة جمالها
إن حسبناها هنلاقيها مش هتزيد عن 15 سنة ....
وبعد كده يبدء كل ده يروح ..
_ يااااااااه ... معقول ....

_ طبعا ... طيب تخيلى معايا كده ...
الست بدأت نضارتها وجمالها يروحوا وفى نفس الوقت زوجها مازل محتفظ بجماله ..
قادر ع الزواج ...
وفى يوم خرج للشارع وحصل الآتى ...
بنوته زى القمر .. جمال ... شياكة ... فى مقتبل العمر ...
وفى أتم نضارتها ... وأوعى تنسى اهم حاجه ... كاشفه زينتها ومفاتنها لكل الناس ...
تخيلى فى الحله ديه ممكن يحصل إيه ؟؟!!!
_ أكيد هيعجب بيها ويروح لها ....!!!!

_ ممكن ... بس نشوف كده سوا ممكن ايه اللى يحصل ...
الارجل ياعينى شايف قدامه جمال إيه ... حاجه كده ماتتوصفش ...
فتلقائى هيفتتن بيها وممكن كمان يسيب زوجته ويتزوج البنوته ديه وانتهى ....
وإذا ماحصلش ده ممكن يحصل حاجه تانيه ...
_ إيه ؟؟!!!

_ .... هيروح البيت ... ومن هنا تحصل الكارثة ...
هيبدء يقارن بين اللى فى البيت وبين اللى شافها فى الشارع ...
وطبعا هيلاحظ الفارق الكبير بين الاتنين ...
ومن هنا هيبدء يبعد عن زوجته وينصرف عنها ...
والسبب فى كل ده ايه ...
إنها من الاول ماكنتش محجبه ...
_ طيب وإن كانت محجبه ؟!!!

_ لا بقى ... ده فرق كبير أوووووووووووى ...
أولا هتكون محافظه على جمالها ونضارتها ..
والاهم من كده .. إنها هتكون حجبت مفاتنها وجمالها عن كل الناس ...
وبالتالى هتفضل محافظه على زوجها وهتفضل فى أمان دايما واستقرار والاهم طبعا ....
هتفضل محافظه على حب زوجها ليها واهتمامه الدايم ....
_...........!!!!!!!!!

_والعجيب بقى إن كل واحده تلاقيها بتفكر فى الحجاب على إنه
منع للحرية وتقييد وخنقة وحاجات كده ملهاش لزمه ...
لكن إذا كل واحده فكرت إنه حماية ليها من عند ربنا ..
وكمان بيحمى بيتى ويزوجى هتحس بالفرق وهتتمسك جدا بحجابها ...
ومش هتسمع كلام الناس بالعكس ...
وقتها هتقولهم أنا فهمت الحكمة من حجابى وهافضل ملتزمه بيه دايما
لانى معايا الحماية من ربى ...
ازاى اسيب حماية ربى واروح لمتع البشر ...
وبكل ثقة تقولهم ....
انا معايا ربنا أنتوا معاكم مين ؟!!!
_ يااااااااااااااااه ... تصدقى عندك حق ....
لازم نفكر فى الحجاب صح ..
ونعرف ازاى ربنا بيحبا وبيحمينا من عنده ...

_ ها ... وقالوا إيه تانى ؟!!!
_ فى منهم اللى قالى ...
الجو حر وانتى تلبسيه إزى فى الحر كده وتخرجى بيه
أكيد هتضيقى منه ومش هتسحملى الحر ألبسيه لما الجو يكون بارد ....

_ ( قل نار جنهم اشد حرا ) ...
ده مش كلامى ده كلامربنا
اللهم سلمنا منها واحفظنا يا الله ...
_ اللهم امين ...

_ إن كنتى هتسحملى حر جهنم ...
أخلعى حجابك ...
_ ومين يقدر يستحمل حرها ...
لالالالا أكيد حر الدنيا أهون كتير ...
وكمان أنا سمعت إن اللى بيستحمل حر الدنيا
ربنا بيهون عليه كتير أوى يوم العرض ...

_ أكيد طبعا ...
وبعدين فى حاجه جربى كده البسى الحجاب وامشى فى الحر ...
وجربى وأنتى من غيره ..
وشوفى الفرق ...
_ هيكون فى فرق ؟!!

_ أكيد ... تصدقى إنك لما تكونى بالحجاب
مش هتحسى بالحر زى لما تكونى مش محجبه ..و ديه حقيقة ..
اسالى اى واحده كده مش محجبه هتقولك
ياااااااااه أنا مش بستحمل الحر خالص وكمان
تلاقيها لابسه كاب ... طيب ليه ..؟!!!
_ عشان يحيمها من الشمس ....

_ ياسبحان الله ...
بالله عليكى لما أكون لابسه الحجاب
مش هكون محميه من حرارة الشمس ...؟!!!
_ أكيد هكون محميه ...
ايه ده ... ازاى صحيح يقولوا الحجاب يحسسنى بالحر ومش هستحمله
... ايه الكلام ده ...
دول أكيد ناس مش بتحاول تشغل عقلها وتفكر ...

_ مش النظرية ...
هما بس بيقولوا أى حجج وخلاص ...
_ غريبه أوى ...
مابدل ماالبس الكاب عشان الشمس ماالبس الحجاب وخلاص ...
وكمان وقتها هاكون عملت حاجه
ربنا أمرنى بيها وهاكسب عليها ثواب ...

_ الله يفتح عليكى ...
شوفتى ازى ...
المهم ... ايه تانى ..؟!!!
_ فى اللى قالى ...
مش هتعرفى تتبعى الموضه وهتبقى ماسكه على شكل واحد
بس مش هتغيريه ... بس أنا ....

_ماهو احنا اتكلمنا ف الموضوعده ....
_ مانتى قطعتى كلامى ...
أنا كنت هكمل وأقول إنى رديت على الكلام ده واقنعتهم بيه كمان ...

_ تمام اوى الحمد لله ...
الله ينور عليكى ... وايه كمان ؟!!
_ منهم اللى قالى ...
إنتى لسه صغيره والعمر قدامك استنى شويه
عيشى شبابك ولما تكبرى حبه ابقى اللبسيه ...

_حلوه عيشى شبابك ده ...
جامده ...
ويعنى إيه لسه صغيرة ؟!!
_ يعنى .... صغيرة ....!!!

_ غريبه أوى ...
طيب قوليلى أنتى دلوقتى مش بقيتى مكلفه
وهتتحاسبى على كل حاجه بتعمليها ؟!!
_ أزاى ... مش فاهمه ؟!!

_ أقولك ...
دلوقتى المفروض إنك بتمرى بفترة الحيض ...
ولما أى بنوته بتوصل للمرحلة ديه بتكون خلاص وصلت لمرحلة البلوغ ...
وفى الحالة ديه أى حاجه بتعملها بتتحاسب عليها سيان بقى خير أو شر ...
وكمان بتاخد عليها الاجر ...
فدلوقتى أنتى بقيتى مكلفه بتفيذ كل أوامر الخالق
وتتعاقبى على عدم تنفيذها كمان ...
والحجاب ديه إيه ...
مش فرض من عند ربنا لينا ؟!!
_ آه ...

_ جميل ...
ولما ربى يقولى اعملى حاجه ومش اعملها بحجة إنى لسه صغيرة ...
_ هتحاسب عليها لانى مابقتش صغيرة ...؟!!!

_ عظيم جدااااا ...
ديه نقطة ...
وفى نقطة تانيه أهم وأعظم ...
_ إيه هى ....؟!!!

_ لما ربنا سبحانه وتعالى يخفى علينا ميعاد موتنا
وانتهاء أجلنا يبقى المفروض عليا اعمل إيه ؟؟!!
_ أجهز نفسى للموت فى أى لحظة ...!!!

_ عظيم .... طيب ولما ربنا سبحانه وتعالى يقولنا
( فإذا جاء أجلهم لايستأخرون ساعة ولا يستقدمون ) ...
يبقى معنى الكلام ده إيه ؟؟!!!
_ إنى بردوه أجهز نفسى للموت ..
عشان لما يجى الوقت أكون مستعده وعملت كل اللى عليا
وأقابل ربنا وهو راضى عنى ...

_ الله أكبر ... بالظبط كده ...
يبقى إيه اللى يخلينى أستنى وماالبسش الحجاب وأنا عارفه
إنى ممكن أقابل ربنا فى أى وقت ...
ياترى تحبى تقالبله وأنتى فى حاجه مهمه أوى هو أمرك بيها ناقصه فيكى ..
ولاتحبى تقابليه بحجابك وانتى وشك منور وفرحانه ... ؟!!!
_ أكيد وأنا بحجابى ....!!!

_ جميل أوى .. يبقى ليه استنى لما أكبر والبسه ..
ليه مش البسه دلوقتى ...
وبعدين فى حاجه مهمه أوى ...
ربنا سبحانه وتعالى بيقولنا فى آية من القرآن
( حتى إذا جاء احدهم الموت قال رب ارجعون لعلى أعمل صالحا فيما تركت .. كلا إنها كلمة هو قائلها ومن ورائهم برزخ إلى يوم يبعثون )
يا الله ... تخيلى ده كان معاه الفرصة وضيعها
ولما انتهى الوقت خلاص بيقول ربى رجعنى تانى ...
بس هو ايه ...
ده خلاص كلمة بتتقال ومش بترجع تانى ..
انتهى خلاص ...
أنتى هتستنى لما تنتهى وتقولى ياربى رجعنى تانى
عشان البس حاجبى والتزم بيه ....
ولا هتعملى ايه؟!!!
_ هالبسه على طول ...
واللى يقولى أنتى لسه صغيرة هاقوله صغيرة منين ..
انت عارف أنا ممكن اموت أمتى ...
وبعدين هتيجى انت وتقول معلش ياربى هى كانت لسه صغية
واحنا اللى قولناه مش تلبسيه دلوقتى ...

_ الله عليكى ... بجد ماشاء الله ...
ايه الجمال ده كله ...
_ الله يخليكى .. جمال ايه بس ...
أنا عايزه اقابل ربى وهو راضى عنى أنا ما صدقت لقيت حد يساعدنى
يبقى اسيب الفرصة منى وأقول بعدين ...
لالالالا ده يبقى اسمه ....

_ لا أوعى ... الحمد لله وبس ....
_ عندك حق الحمد لله وبس ....

_ جميل كده ..
وقالوا ليكى ايه تانى ..؟!!!
_ ومنهم اللى قالى ...
مش شرط إنك تكونى محجبه علشان تثبتى إنك بتحبى ربنا
يكفى انك تحبى ربنا من جواكى ....

_ ربك قال لحبيبك النبى صلى الله عليه وآله وسلم فى كتابه الكريم
( قل ان كنتم تحبون اللهفاتبعونى يحببكم الله ) ...
_ تمام فهمتك ...

_ الحمد لله .. فى إيه تانى ؟!!!
_ فى اللى قالى ... الاسلام دين يسر ...
ليه بقى تصعبيها على نفسك ...

_ ربنا سبحانه وتعالى قال فى كتابه الكريم
( يريد الله بكم اليسر ولا يريد بكمالعسر ) ...
وتعرفى إن الحجاب من يسر الاسلام
ومش تصعيب ولا حاجه زى مابيقولوا ...؟!!
_ من يسر الاسلام ... ازاى ديه ؟!!

_ ربنا سبحانه وتعالى فرض علينا الحجاب عشان يحمينى
ويمنعنى من إنى ارتكب ذنوب كتيره اوى ومعاصى كمان ...
فبالتالى حجابى هيمنعنى من انى اروح ليها
واعملها وبكده هلاقى نفسى بقرب من ربى بسهوله جدا وبعمل حاجات كتيره اوى جميله تقربنى
منه أكتر وأكتر وأكون معاه باستمرار ...
وكمان يكون راضى عنى ...
شوفتى ازاى بقى الحجاب من يسر الاسلام ؟!!!
_ أيوه فعلا ... سبحان الله ... بجد ...
حجابى هيمنعنى من حاجات كتير غلط ...

_ بس استنى ...
بشرط إنى أكون ملتزمه بيه بجد مش كلام وخلاص ...
_ أيوه صح ...
أهم حاجه إنى التزم بيه ومش أكون لبساه اسما وخلاص ...

_ أحسنتى ... ها ...
لسه فى أسئلة تانيه ؟!!
_آه ... فى منهم قالى ...
طهاره القلب تغنى عن الحجاب ...

_ إن طهر القلب لاستقامة باقى الجوارح ...
وحجابى دليل على طهارة قلبى ...
وبعدين مافيش حاجه تغنى عن حاجه ...
الكلام ده يقوله اللى مش عايز يعمل أى حاجه وبيطلع لنفسه حجج وخلاص ...
_ فعلا ...
تمام أوى كده ...
أنتى رديتى على كل سؤال هما لعبوا فى دماغى بيه ...

_ الحمد لله ...
يعنى خلاص مش هاسمع كلام الناس تانى
وهافضل ثابته على اللى احنا وصلنا ليه ... ؟!!!
_ الحمد لله ... وهقول كمان ...
استغفر الله العظيم الذى لا إله إلاهو الحى القيوم وأتوب إليه ...

_ ربنا يهديكى ويهدينا الى صراطه المستقيم دائما إنشاء الله ...
_ إن شاء الله ...

_ فى أى حاجه تانيه ياجميل عايزه تسالى عنها
أو تتأكدى منها ؟!!
_ لاء خلاص ... أنا دلوقتى تمام أوى ...

_ جميل أوى ....
وأنا دلوقتى أتأخرت أوى ...
_ ******ه... يعنى هتمشى كالمعتاد ...

_ أيون يافندم ... حصل ...
*********
_ خلاص ياستى وأنا مش هأخرك أكتر من كده ...

_ ماشى ياقمرى .. وأنتى عارفه أى حاجه أنا فى الخدمة ...
_ ربنا يخليك ويكرمك ...

اللهم آمين ....
_ نقول بقى السلام عليكم ورحمة الله وبركاته ...

نقول وعليكم السلام ورحمة الله وبركاته

سبحانك اللهم وبحمدك نشهد ان لا اله الا انت نستغفرك ونتوب اليك

أتمنــــى لكـ من القلب .. إبداعـــاً يصل بكـ إلى النجـــوم ..

سطرت لنا أجمل معانى الحب

بتلك الردود الشيقة التي تأخذنا

إلى أعماق البحار دون خوف

بل بلذة غريبة ورائعة

دمت لنا ودام قلمك

» خليكى اجمل الحلقه السابعه
» خليكى اجمل الحلقه الثامنه
» خليكى اجمل الحلقه العاشره
» خليكى اجمل الحلقه الاولى
» الحلقه الثانيه خليكى اجمل