لن يكون سلوكي خنجر في صدر الإسلام الدرس الأول(( الأخلاص ))

بسم الله الرحمن الرحيم والصلاة والسلام علي خير المرسلين سيدنا محمد واله وصحبه ومن تبعه الي يوم الدين

حبيباتي واخواتي كيف حال قلوبكم مع الله
وكيف حالنا مع الاخلاص
نسأل الله الاخلاص في القول والعمل ونعوذ بالله من الرياء
فالرياء هو عكس الاخلاص
الاخلاص هيكون هو درسنا الاول في حمله تحسين السلوك
اولا يعني ايه اخلاص
تعريف الاخلاص
أن يعمل المسلم الملتزم العمل الصالح الذي يرضي الله ابتغاءا لمرضات الله طمعا في ماعند الله من ثواب أمتثالا لأمر الله تعالي
يعني أزاي هقولكم .... تبقي نيتنا متجهة لله تعالي
(( الله غايتنا - القصد لله - النيه لله ))
قال الله تعالي امارا أيانا بالاخلاص وهو أساس لقبول أي عمل
((تنزيل الكتاب من الله العزيز الحكيم ( 1 ) إنا أنزلنا إليك الكتاب بالحق فاعبد الله مخلصا له الدين ( 2 ) ألا لله الدين الخالص والذين اتخذوا من دونه أولياء ما نعبدهم إلا ليقربونا إلى الله زلفى إن الله يحكم بينهم في ما هم فيه يختلفون إن الله لا يهدي من هو كاذب كفار ( 3))

ألا لله الدين الخالص لان الله لايقبل العمل ألا لو كان خالصا لوجهة الكريم
يبقي هنعمل ايه .... اولا لازم عملك تبتغي به مرضات الله والنيه في العمل لمرضات الله وقصدك في عملك هو مرضات الله
يقول الله عز وجل
إنا أنزلنا عليك الكتاب بالحق فاعبد الله مخلصا له الدين وده امر من الله تعالي لرسوله ان يعبد الله مخلصا
وايضا قال رسول الله صلي الله عليه وسلم
إنما الأعمال بالنيات و إنما لكل امرئ ما نوى فمن كانت هجرته إلى الله و رسوله فهجرته إلى الله و رسوله و من كانت هجرته إلى دنيا يصيبها أو امرأة ينكحها فهجرته إلى ما هاجر إليه
رواه مسلم
وايضا يقول رسول الله صلي الله عليه وسلم
إن الله لا ينظر إلى أجسامكم ولا إلى صوركم ولكن ينظر إلى قلوبكم وأشار بأصابعه إلى صدره وأعمالكم
رواه مسلم
وقال رسول الله صلي الله عليه وسلم
من سأل الله تعالى الشهادة بصدق بلغه الله منازل الشهداء ، وإن مات على فراشه ))
رواه مسلم
زي مين زي سيدنا خالد بن الوليد رضي الله عنه
يعني هبقي علي فراشي واموت شهيدة وابقي في منازل الشهداء
هقولك ده كلامك حبيبك صلي الله عليه وسلم مش هو اللي قالنا كده في
حديثه صلي الله عليه وسلم بس ايه اهم حاجة النية نيتك تبقي صادقة خالصة لوجه الله تعالي
طيب واللي نيته وحشه بيتحاسب بيها
هقولك حديث عن رسول الله صلي الله عليه وسلم
:‏ ‏إذا التقى المسلمان بسيفيهما فالقاتل والمقتول في النار فقلت : يا رسول الله هذا القاتل فما بال المقتول قال : إنه كان حريصاً على قتل صاحبه.
يعني المقتول هذا عومل بنيته وجوزي بيها لان نيته كان ان يقتل مع انه مات مقتول ولم يقتل بس ربنا سبحانه عامله بنيه القتل
طيب سؤال : انا اعرف ازاي اذا كنت مخلصا في العمل
انا بعمل عمل لله ياتري فيه اخلاص ولا مافيهوش

ههقولك اسألي نفسك انتي بتعملي العمل دة ليه
كلمه ليه هتبينلك
ليه علشان اللي قدامي يبقي مش اخلاص
بمعني
زوجة بتعامل زوجها معاملة طيبة جدا جدا وماشاء الله عليهاطيب بتعمله كويس ليه
(( والله أصل هو كويس معايا وعمري ماطلبت منه طلب وقالي لأ ))يبقي ده مش اخلاص طيب الدليل هو زوجك لو عملك معاملة سيئة وقل بأصله معاكي هتعملي أيه(( هقلبله عل الوش التاني وهوريله اللي عمره ماشافه )
يبقي ياحلوة عملك مش لله عملك كان لزوجك علشان كان كويس معاكي يبقي كده مافيش اخلاص انما الاخلاص انك تعملي العمل بتبغي بيه مرضات الله تعالي
طمعا في ما عند الله من ثواب
سؤال كمان حالك ايه مع جارتك
هتقولي الحمد لله كويسة مع جارتي
هقولك ليه تقولي واحدة علشان هي كويسة معايا عمري ماطلبت منها حاجة ورفضت طيب افرض رفضت مرة واعملتك وحش اواو او
هتعملي ايه ( واحدة تقولي اعمل ايه هعملها بنفس المعاملة )
لا يبقي كده برده مافيش اخلاص
طيب بتزوري اهلك وأقاربك ايوه الحمد لله
طيب ليه بتزوريهم : اصل هما بيزروني وبنود بعض )
طيب تمام افرض بقي قاطعوا زيارتهم ليكي هتعملي ايه
أه لو قطعوا الزياره هقطع انا برده )
يبقي كده برده مافيش اخلاص الاخلاص الحقيقي
( اني اخلي عملي كله لله الله غايتنا ...
اه في ناس تانيه تقولك لا الكلام ده مايمشيش انهاردة
هو في حاجة تتعمل لسبيل الله
انهاردة كل حاجة خد وهات قدم السبت تلقي الحد قدامك
لا ياحلوة المسلمة الحقيقية مع الله دائما في كل اعمالها
ولذلك الله عز وجل وضح أن عكس الاخلاص الرياء
ايه بقي هو الرياء
الرياء في اللغه
راءاه : أظهر أمامه خلاف ما هو عليه .
يعني الواحد يعمل العمل الصالح أه بس ايه (( هات وخد ))
يعني العمل مايبقاش لله
بتعمل العمل علشان مستنيه مستينه ايه ومستنيه مين
مستنيه كلمة شكر او ثناء عليها
العبد بينسي والخير بيضيع عند العبد
لكن عند الله ......
ووصف الله تعالي المرائين في قوله
والذين ينفقون أموالهم رئاء الناس ولا يؤمنون بالله ولا باليوم الآخر
ومن يكن الشيطان له قرينا فساء قرينا
وربنا تبارك وتعالي يتوعد للذي يرائي بعمله
(( الذين يرأون ويمنعون الماعون ))
(( فويل للمكذبين )) لأن المرائي هذا من المكذبين
ايوه هما اعمال كويسة وصالحة بس يبتغون من وراء هذة الاعمال
يبتغون الناس وليس الله عز وجل
وفي سورة البقرة يقول الله عز وجل
((الذين ينفقون أموالهم في سبيل الله ثم لا يتبعون ما أنفقوا منا ولا أذى لهم أجرهم عند ربهم ولا خوف عليهم ولا هم يحزنون ))
ودول المخلصين ليهم اجر عند ربهم سبحانه وتعالي
أما المرائين ربنا سبحانه وتعالي قال فيهم
((يا أيها الذين آمنوا لا تبطلوا صدقاتكم بالمن والأذى كالذي ينفق ماله رئاء الناس ولا يؤمن بالله واليوم الآخر فمثله كمثل صفوان عليه تراب فأصابه وابل فتركه صلدا لا يقدرون على شيء مما كسبوا والله لا يهدي القوم الكافرين
والنبي صلي الله عليه وسلم يوضح عقاب المرائي الذي يعمل العمل الصالح للناس وليس لله عز وجل
قال صلي الله عليه وسلم
(( من سمع سمع الله به ومن يرائي يرائي الله به ))
رواه مسلم
بمعني ..... من سمع يعني عمل خير بس علشان الناس تثني عليه او تشكروا أو يكون هدفه المصلحة غير الثواب والاجر من عند الله عز وجل
( سمع الله به )) يعني فضحه الله علي رؤس الاشهاد
كما قال صلي الله عليه وسلم
(( إن أول الناس يقضي عليهم يوم القيامة ثلاثة
ـ : رجل استشهد في سبيل الله فأتي به فعرفه نعمة فعرفها
قال : فما عملت فيها ؟
قال : قاتلت في سبيلك حتى قتلت ،
قال له كذبت ولكنك قاتلت ليقال هو جرئ ، فقد قيل ،
ثم أمر به فسحب على وجهه حتى ألقي في النار
ورجل تعلم العلم وعلمه وقرأ القرآن فأتي به فعرفه نعمة فعرفها
قال فما عملت فيها ؟
قال تعلمت العلم وعلمته وقرأت فيك القرآن .
قال كذبت ، ولكنك تعلمت ليقال هو عالم وقرأت ليقال هو قارئ فقد قيل
ثم أمر به فسحب على وجهه حتى ألقي في النار .
ورجل وسع الله عليه فأعطاه من أصناف المال فأتي به فعرفه نعمة فعرفها
قال فما عملت فيها ؟
قال ما تركت من سبيل تحب أن ينفق فيه إلا أنفقت فيه لك ،
قال الله كذبت ولكنك فعلت ليقال هو جواد فقد قيل
ثم أمر به فسحب على وجهه حتى ألقي في النار ))

لازم تعرفي يا اختى أن الشيطان بيبقي حريص جدا علي انه يوقع بكي في اي الامرين
اما يخليكي تعملي العمل رياء وسمعة .......
أو يخلكيي تتركي العمل خالص ..........
اما بقي المسلمة الصادقة في نيتها مبيهماش
مايلقيه الشيطان في قلبها من وساوس
ان تتركي عملك الصالح بحجة خوفك من الرياء
سئل الشيخ ابن باز رحمه الله :
امرأة تسأل فتقول :
إني أخاف من الرياء وأحذره لدرجة أنني
لا أستطيع أن أنصح بعض الناس
أو أنهاهم عن أمور معينة مثل الغيبة والنميمة ونحو ذلك ،
فأخشى أن يكون ذلك رياء مني ،
وأخشى أن يظن الناس فيّ ذلك ويعدوه رياء فلا أنصحهم بشيء ،
كما أني أقول في نفسي : إنهم أناس متعلمون ،
وليسوا في حاجة إلى نصح ، فما هو توجيهكم ؟

فأجاب :

" هذا من مكايد الشيطان ،
يخذل بها الناس عن الدعوة إلى الله وعن الأمر بالمعروف والنهي عن المنكر ،
ومن ذلك أن يوهمهم أن هذا من الرياء ،
أو أن هذا يخشى أن يعده الناس رياء
فلا ينبغي لك أيتها الأخت في الله أن تلتفتي إلى هذا ،
بل الواجب عليك أن تنصحي لأخواتك في الله وإخوانك
إذا رأيت منهم التقصير في الواجب أو ارتكاب المحرم
كالغيبة والنميمة وعدم التستر عند الرجال ولا تخافي الرياء ،
ولكن أخلصي لله واصدقي معه وأبشري بالخير ،
واتركي خداع الشيطان ووساوسه ،
والله يعلم ما في قلبك من القصد والإخلاص لله تعالى والنصح لعباده ،
ولا شك أن الرياء شرك ولا يجوز فعله ،
لكن لا يجوز للمؤمن ولا للمؤمنة أن يدع ما أوجب الله عليه من الدعوة والأمر بالمعروف والنهي عن المنكر خوفا من الرياء ،
فعليه الحذر من ذلك ، وعليه القيام بالواجب في أوساط الرجال والنساء ،
والرجل والمرأة في ذلك سواء ،

وقد بين الله ذلك في كتابه العزيز حيث يقول سبحانه :
( وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاءُ بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَيُقِيمُونَ الصَّلاةَ وَيُؤْتُونَ الزَّكَاةَ وَيُطِيعُونَ اللَّهَ وَرَسُولَهُ
أُولَئِكَ سَيَرْحَمُهُمُ اللَّهُ إِنَّ اللَّهَ عَزِيزٌ حَكِيمٌ )

التوبة/71 . "فتاوى ابن باز" (6/403) .

واعلمي يا حبيبتي ان الرياء ده خطره عظيم وان النجاة منه
بتحتاج لجهد كبير وانك تراقبي نفسك علي طول
لان دايما قلوبنا بتبقي سريعة التقلب
ياه سبحان الله انك ممكن تعملي عمل صالح وتتعبي فيه جدا
وكل جهدك ده بينزل علي الارض أزاي
لان ده بيبقي رياء بأعمال البر يعني العمل
يتعمل بس علشان الناس يمدحوا فيكي
واحدة تصلي وتصوم وتحج وتقرأ القرأن أو تصدق او احسان الي الناس
كل ده علشان الناس تمدحها يبقي كده مافيش ثواب للعمل ده
لا مش بس كده لاده فيه أثم كبير
واعلمي يا اختى ان الرياء والثواب عمرهم ما بيجتمعوا
وذلك لحديث أبي داود والنسائي بالإسناد الى أبي أُمامة
قال: جاء رجل
فقال: يا رسول الله أرأيت رجُلاً غزا يلتمِسُ الأجْر والذِكْرَ ما لَهُ؟
قال: "لا شىء له"، فأعادها ثلاثاً كل ذلك يقول: "لا شىء له"
ثم قال له رسول الله صلى الله عليه وسلم:
"إنَّ الله لا يَقبَلُ من العمل إلا ما كان خالصاً له وما ابتُغِيَ وجْهُه".

بمعني ..... ان اللي قصد الجهاد بنية الحصول على مال من طريق الغنيمة يبقي مالوش اجر عند الله تعالي وبرده اللي كانت نيته الثناء والشكر من الناس او السمعة برده مالوش اجر

طيب تعالي بقي نعرف انواع الرياء
الرياء من جهة البدن
أن يكون من جهة البدن، بإظهار النحول والصفار،
ليريهم بذلك شدة الاجتهاد، وغلبة خوف الآخرة،
وكذلك يرائي بتشعث الشعر، ليظهر أنه مستغرق في هم الدين،
لا يتفرغ لتسريح شعره .
ويقرب من هذا خفض الصوت، وإغارة العينين،
وذبول الشفتين، ليدل بذلك على أنه مواظب على الصوم
الرياء من جهة الزي
كالإطراق حالة المشي،
وإبقاء أثر السجود على الوجه، وغلظ الثياب، ولبس الصوف، وتشمير الثياب كثيراً، وتقصير الأكمام، وترك الثوب مخرقاُ غير نظيف . ومن ذلك لبس المرقعة، والثياب الزرق، تشبهاً بالصوفية مع الإفلاس من صفاتهم في الباطن . ومنه التقنع فوق العمامة، لتنصرف إليه الأعين بالتمييز بتلك العادة .
الرياء بالقول
ورياء أهل الدين بالوعظ والتذكير وحفظ الأخبار والآثار، لأجل المحاورة،
وإظهار غزارة العلم والدلالة على شدة العناية بأحوال السلف،
وتحريك الشفتين بالذكر في محضر الناس،
وإظهار الغضب للمنكرات بين الناس، وخفض الصوت وترقيقه بقراءة القرآن،
ليدل بذلك على الخوف والحزن ونحو ذلك

الرياء بالعمل
النوع الرابع : الرياء بالعمل،
كمرآة المصلى بطول القيام، وتطويل الركوع والسجود،
وإظهار الخشوع، ونحو ذلك .
وكذلك بالصوم والغزو والحج والصدقة ونحو ذلك .
المراءاة بالأصحاب والزائرين
النوع الخامس : المراءاة بالأصحاب والزائرين،
كالذي يتكلف أن يستزير عالماً أو عابداً، ليقال : إن فلاناً قد زار فلاناً، وإن أهل الدين يترددون إليه، ويتبركون به،
وكذلك من يرائي بكثرة الشيوخ، ليقال : لقي شيوخاً كثيرة، واستفاد منهم، فيباهى بذلك،
****
فهذه مجامع ما يرائي به المراؤون، يطلبون بذلك الجاه والمنزلة في قلوب العباد .
ومنهم من يطلب مجرد الجاه، وكم من عابد اعتزل في جبل، وراهب انزوى إلى دير، مع قطع طمعهم من مال الناس، لكنه يحب مجرد الجاه .
ومنهم من يكون قصده المال، ومنهم من قصده الثناء وانتشار الصيت .

الاخلاص والدعوة إلى الله

اخواتى الغاليات

ان كان الاخلاص مطلوب من كل مسلم عامة فهو مطلوب من الداعية الى الله خاصة

من أهم صفات الداعية إلى الله أنها تكون مخلصة لله عز وجل في دعوتها إليه

إيه ده إيه ده إيه الكلام ده اللي بتقوليه

هو في داعية إلى الله مش مخلصة

أيوه يا حبيباتي طبعا في وللأسف مش قليلين

وربنا يسلمنا يارب ويجعل أعمالنا خالصة لوجهه

إزاي بس بتقولي الكلام ده ؟

أقول لكم إزاي

مثلا معانا اخت حبوبه بتحب الدعوة جدا وليكن اسمها نجوى

حبيبتنا نجوى راحت المسجد وبتعطي الدرس وطبعا تعبت فيه جدا عبال ما حضرته

لكن تفاجئ بان الناس ماقالولهاش حتى شكرا

وروحت محبطة جدا

وقالت ايه ده؟
فين احترام العلماء
دا حتى جزاك الله خيرا ماقالوهاش
انا مش رايحه المسجد ده تاني
دول ناس مش بتفهم خساره فيهم تعبي

ها يا بنات
دي كان عملها لله
؟؟؟؟؟؟؟؟؟؟؟؟؟؟؟

دي كانت بتشتغل ومنتظره كلمة شكر
للاسف كل تعبها ررررررررررررررررراح على الارض

إنما نطعكم لوجه الله لا نريد منكم جزااااااااء ولا شكوووووووووورا

كتير يا بنات بيقع في المطب ده

يكون في اول الامر نيتنا ان العمل لله
لكن
من اول ابتلاء واختبار
يضيع العمل

أحسب الناس ان يقولوا امنا وهم لا يفتنون

*****

مثال تاني:

الأخت شيماء
أخت بتحب الدعوة أوي
بس اتجوزت وانشغلت جدا بعد الجواز
جت صاحبتها لمياء تزورها واثناء حوارهم تطرقوا للدعوة
فلمياء حست ان شيماء زعلانه من بعدها عن مجال الدعوة
فقالت لها

شيمو ايه رائيك محاضراتك وشغلك تنزليه على النت والكل يستفيد وانت قاعده في بيتك

ايوه يا ليمو بس انت عارفه انا عندي بيبي صغير ومش باقعد على البي سي كتير

مافي مشكلة هاتي المحاضرات وانا انزلها لك على المنتدى بحسابي

شيمو سرررررررحت وقالت في نفسها

(تنزلوه باسمها هيا؟؟؟ازاي بس ده مجهودي انا وتعبي انا والناس تقعد تشكر فيها بقى وانا اطلع من المولد بلا حمص)

شيمو انت روحتي فين

هاا اه اناااا هنا اهوه

سرحتي في ايه يا جميل

لالا ابدا

ها ايه رائيك في الفكره دي

اممم طيب ماشي بس انا خايفه اتعبك بس

لالا ولا يهمك اهو كله بثوابه

وتاني يوم
لمياء اتصلت بشيماء وهي فرحانه اوي وبتقول

شيمو مش قادره اقول لك الناس فرحانه اد ايه بالدرس اللي نزلتوه
افتحي كده يا شيمو وشوفي تعليقات الناس على الموضوع

بجد يا ليمو فرحتيني والله

طيب ياللا افتحي وبصي بصه بس

ايوه بس الواد على ايدي

يابنتي خمس دقايق

فتحت شيمو المنتدى ودخلت وشافت كم الثناء على صحبتها وشكر الناس للمياء
وعينكم ماتشوف الا النووووووور
جسمها قاد نار واتعصبت
وبقيت حتتجن
دي سرقتني دي اخدت مجهودي دي دي دي دي
وطبعا ما اخدتش بالها ان صحبتها لمياء كاتبه انه منقول ومش من تاليفها

ها يا بنات
دي هدفها كان لله ؟

دي كانت منتظره الثناء
دي كانت عاوزه الظهور والشهرة

شوفتوا بقى يا بنات ان ممكن كلنا نقع في الرياء بدون ما نشعر

يارب سلم سلم

اللهم ارزقنا الاخلاص في القول والفعل

طيب ايه هو ترموميتر الاخلاص ؟

إنما نطعكم لوجه الله لا نريد منكم جزااااااااء ولا شكوووووووووورا

هل انا منتظره شكر من حد ؟

هل انا منتظره ثناء من حد ؟

أنا أعمل العمل وبس

أما النتيجة فمتهمنيش

ما على الرسول إلا البلاغ

صدقوني يا بنات ربنا يبارك في الاعمال اللي فيها اخلاص

وتلاقيها اثمرت وجابت نتيجة ولو بعد حين

يكفى بالبركة في الوقت والنفس والأهل

وما بيشعرش بكده الا المخلصين فقط

انا عارفه ان جهاد النفس في مسالة الاخلاص صعبة جدا

بس هو مربط الفرس

لو تعبنا الان في مجاهدة النفس وترويضها على الاخلاص حنرتاح هنااااك

حنرتاح في الأخرة

في الجنة

مغريات النفس كتير

وأعدائنا كتير

النفس

الهوى

الدنيا

شياطين الأنس والجن

كل دول بيحاربوكي علشان ماتعمليش عمل خير

ونفسك بقى لما تلاقيكي خلاص حتعملي عمل خير

حتستلمك وتحاول تخليكي ترائي وتعملي العمل لحظ من حظوظ نفسك مش لله

طيب أخلص دعوتي إزاي؟

أولا:قبل اي عمل دعوي أسأل نفسي بأعمله ليه؟؟

ثانيا:بعد الانتهاء من العمل احط نصب عيني

إنما نطعكم لوجه الله لا نريد منكم جزااااااااء ولا شكوووووووووورا

طيب واحده حتيجي تسالني وتقول

بس ثناء الناس بيفرحني وده بيكون غصب عني كده اكون انا مرائيه ومش مخلصة

طبعا لا يا حبيبتي

ده عاجل بشرى المؤمن كما قال حبيبك عليه الصلاة والسلام

انت ماكنتيش منتظره ثناء الناس ولما الناس أثنت عليكي أنت فرحتي وده شئ عادي

يبقى الفيصل

نيتك

جواكي ايه

قلبك منتظر النتيجة ولا بتعملي العمل ومنتظره الأجر من الله ؟

وعلى فكره في ناس كتير متخيله ان اجر يبقى فلوس

وتقول لك انا مش منتظره اجر

بس منتظره ثناء وشكر وتعظيم ورفعة ومكانه بين الناس

ماهو كل ده يا حبوبه ضمن الأجر بردوا

أنت انسي خااااااااالص مابعد عملك الدعوي

طيب نيجي على النقيض

بنوته حبوبه زي السكره اسمها مريم شافيت صاحبيتها هند بتكسل في الصلاة شويه

راحت مكلماها بكل هدوء على اهمية الصلاة وحكم تأخير الصلاة

راحت هند داخله في مريم شماااااااال
وطيخ طاخ طوخ

راحت مريم حلفت ماهي مكلمه حد تاني على اى غلط يعملوه
وقالت
وأنا مالي
كل واحد حر
أنا ايه اللي نابني غير وجع الدماغ والتهزيق

بقى ده جزائي اني خايفه عليها من تأخير الصلاة

اممممممممممممم
ها يا بنات

هي كده صح
؟؟؟؟؟؟؟؟؟

هو الدعوة ماتحلاش إلا بس الثناء والتصفيق وبس

الدعوة إلى الله جهاد

والأذى في الدعوة سنة كونية

والعصر إن الانسان لفي خسر الا الذين ءامنوا

وتواصوا بالحق
وتواصوا بالصبر

شوفتوا ازاي

نوصي ونتناصح وندعو إلى الله

ونصبر على أي أذى وابتلاء نتج عن الدعوة إلى الله

يبقى اللي يسيب الدعوة علشان دي بصيت لها ودي هزئيتها ودي كلمتها ماعرفش ازاي

يبقى هي ماكانتش طالعه تدعو الى الله من أصله

خلوا بالكم يا بنات

الفرق بين الاخلاص والرياء شعره

وهي عزمك وقصدك

ومافي حد مطلع عليكي غير ربك

فاستعيني بالله

وادع الله كثيرا انه يرزقك الاخلاص

بارك الله فيكن ونفع بكن

وإلى لقاء مع درس جديد إن شاء الله مع خلق جديد وسلوك قويم

أحبكن في الله

أتمنــــى لكـ من القلب .. إبداعـــاً يصل بكـ إلى النجـــوم ..

سطرت لنا أجمل معانى الحب

بتلك الردود الشيقة التي تأخذنا

إلى أعماق البحار دون خوف

بل بلذة غريبة ورائعة

دمت لنا ودام قلمك

» لن يكون سلوكي خنجر في صدر الاسلام الدرس الثاني ( الرفق )
» لن يكون سلوكي خنجر في صدر الأسلام الدرس الثالث (( الصدق ))
» لن يكون سلوكي خنجر في صدر الاسلام الدرس السادس (( الامانه))
» لن يكون سلوكي خنجر في صدر الأسلام الدرس السابع (( العفو ))
» لن يكون سلوكي خنجر في صدر الأسلام الدرس السابع (( العفو ))